Wanafamilia wapoteza fahamu usingizini

WATU wanne wa familia moja wakiwemo watoto wawili wamelazwa katika zahanati ya Kata ya Kisorya, wilayani Bunda, baada kupoteza fahamu katika mazingira ya kutatanisha wakiwa wamelala ndani ya nyumba yao.

Wanafamilia hao ambao ni Juma Abdallah na mkewe, Hadasa Juma, pamoja na watoto wao Adventina na Vaileth, wamenusurika kifo baada ya wananchi kuvunja mlango wa nyumba walimokuwa na kuwakimbiza kwenye zahanati hiyo kwa ajili ya matibabu.

Diwani wa Kisorya, Misana Jigwila na Ofisa Mtendaji wa kata hiyo, Mashaka Mahulilo, walisema tukio hilo ambalo limeripotiwa polisi lilitokea jana, saa moja asubuhi katika Kijiji cha Nambubi, wilayani hapa.

Ilielezwa kuwa wanafamilia hao walipoteza fahamu na kuishiwa nguvu wakiwa wamelala na kwamba waligunduliwa na ndugu yao mmoja alipofika nyumbani hapo na kuwakuta wakikoroma kwa sauti kubwa.

Kutokana na hali hiyo, wananchi na viongozi walifika eneo hilo na kuvunja mlango wa nyumba hiyo, ambapo waliwakuta wakiwa hawajitambui na kuwakimbiza zahanati.

Mganga wa zamu katika zahanati hiyo, Stephen Mashaga, alisema hadi jana mchana walikuwa hawajajitambua na kwamba juhudi za kuokoa maish yao zinafanyika, ikiwa ni pamoja na kuchunguza kilichowasibu na kufikia hali hiyo.

Wakazi wa Kijiji cha Nambubi pamoja na Kata ya Kisorya kwa ujumla walilihusisha tukio hilo na mambo ya ushirikina.

Chanzo: Tanzania Daima