Kumekuchaa!

NI kweli kumekucha! Kipyenga cha kuanza kwa kampeni za uchaguzi mkuu 2015 kimepulizwa. Tume ya Taifa ya Uchaguzi (Nec) imesema leo ndiyo siku ambayo wagombea udiwani, ubunge na urais wa vyama vyote wanaruhusiwa kuanza kujinadi kwa wapigakura, Risasi Jumamosi lina kila kitu.

Jiji la Dar es Salaam ambalo linaaminika kuwa na wapiga kura wengi kuliko majiji mengine manne nchini kote (Arusha, Mwanza, Tanga na Mbeya), hali ni ya msisimko tangu juzi (Ijumaa) ambapo baadhi ya barabara zilianza kuwekwa sawa kwa ajili ya kuruhusu wagombea kupita na magari yao kwenda kwenye viwanja vya kampeni.

 

CCM, UKAWA NDIYO GUMZO

Kampeni jijini Dar zinazotazamwa kwa macho makubwa ni mbili. Ya Chama Cha Mapinduzi (CCM, mgombea wake John Magufuli) ambayo itasimamisha jiji kesho kwenye Viwanja vya Jangwani vilivyopo wilayani Ilala na ile ya Chama cha Demokrasia na Maendeleo (Chadema, mgombea wake Edward Lowassa) chini ya Umoja wa Katiba ya Wananchi (Ukawa) zitakazofanyika Agosti 29, 2015 huku vyama vingine navyo vikianza leo nchini kote.

BARABARA YA MOROGORO

Mhandisi mmoja wa Halmashauri ya Jiji la Dar ambaye alisema yeye si msemaji mkuu, alilidokeza gazeti hili kwamba, upande mmoja wa Barabara ya Morogoro (kutokea Kariakoo kwenda Mbezi) utakula kitanzi kuanzia mchana wa kesho ili kuwezesha magari ya msafara wa wana CCM, mgombea wake, John Magufuli na wapambe kuweza kuingia kwenye viwanja hivyo kwa ajili ya kuzindua kampeni ambayo rais anayemaliza muda wake, Jakaya Kikwete ‘JK’ atakuwepo.

WASIO NA KAZI MUHIMU MJINI

Baadhi ya wakazi wa Jiji la Dar ambao kesho watakuwa hawana kazi za muhimu mjini, wametakiwa kujituliza majumbani mwao ili kukwepa usumbufu unaoweza kujitokeza kutokana na usafiri wa umma kuingiliwa na misafara ya kampeni, hususan kwa Barabara ya Morogoro.

Akitoa maelekezo kwa wakazi wa Jiji la Dar alipozungumza na wanahabari ofisini kwake, Ilala juzi, Mkuu wa Mkoa wa Dar es Salaam, Said Mecky Sadik alisema Kamishna wa Polisi Kanda Maalum ya Dar es Salaam, Suleimani Kova ataweka mambo yote hadharani.

KAMANDA KOVA

Kwa mujibu wa Kamanda Kova, ni vyema wananchi wakatambua kuwa polisi wamejipanga kuhakikisha ulinzi unakuwepo kwa asilimia mia moja.

“Polisi haitamuonea mtu. Ila nawaomba wale wanaotaka kutumia wingi wa watu na misafara kufanya uhalifu waachane na mawazo hayo kwani jeshi la polisi lipo macho saa ishirini na nne.”

Aidha, Kamanda Kova alipiga marufuku tabia za baadhi ya wakazi wa Jiji la Dar kuwazomea wanachama waliovaa mavazi yenye utambulisho wa vyama vyao.

CCM WATAMBA NA ‘HAPA NI KAZI TU’

Tayari wana-CCM wamekuwa wakiutumia msemo wa mgombea wao kwamba atafanya kazi kwa kiwango cha juu ‘hapa ni kazi tu’ kujifagilia kwamba, ushindi ni wao wakimpamba mgombea huyo kuibuka na ushindi wa kishindo.

UKAWA WAO NI ‘SAFARI YA MABADILIKO’

Wakati CCM, wakitamba na msemo wao huo uliojipatia umaarufu mkubwa kwenye mitandao ya kijamii na mitaani, Ukawa wao wanasimamia ‘slogani’ ya Safari ya Mabadiliko ambayo mgombea wake, Edward Lowassa amekuwa akiitumia tangu alipojiunga na umoja huo Julai, mwaka huu.

NI KAMA SIMBA NA YANGA

Baadhi ya wakazi wa Jiji la Dar, walipozungumza na gazeti hili kuhusu kuanza kwa kampeni nchi nzima leo, walisema ni kama refa amepuliza kipyenga tayari kuanza kwa mpira wa fainali ya timu kubwa mbili za Simba na Yanga.