Wanafunzi wataka Nec kutafuta ufumbuzi wapige kura

 

Wanafunzi wa Shule ya Arusha Sekondari wameiomba Tume ya Taifa ya Uchaguzi (Nec) kutafuta ufumbuzi kwa wanafunzi waliojiandikisha vituo tofauti na walipo sasa ili waruhusiwe kupiga kura.

Waliyasema hayo wakati wa mafunzo ya elimu ya uraia na mpigakura yaliyotolewa na Taasisi ya Dira ya Vijana Tanzania (TYVA) jana.

Katika mchango wake kuhusu elimu hiyo, mwanafunzi wa kidato cha sita shuleni hapo, Glory Kamwela, aliiomba serikali kurekebisha kasoro za uandikishaji zinazosababisha wanafunzi wa shule za bweni na taasisi za elimu ya juu, kukosa haki ya kupiga kura kutokana na kujiandikisha maeneo tofauti na wanayokuwapo siku ya kupiga kura.

Alisema kwa mfano wanafunzi wengi mwaka huu watakosa haki ya kupiga kura kutokana na baadhi kujiandikisha maeneo tofauti na wanapokuwapo siku ya kupiga kura.

“Serikali lazima irekebishe hali hii kwa chaguzi zijazo,” alisema.

Kwa upande wake, Naylah Ally, anayesoma kidato cha sita, alivitaka vyama vya siasa, wagombea na taasisi zinazohusika na utoaji wa elimu ya uraia, upigaji kura na kunadi sera kuelekeza nguvu maeneo ya vijijini.

“Huko ndiko wanakoishi wapigakura na wananchi wengi wanaokabiliwa na changamoto ya mawasiliano na upatikanaji wa habari,” alisema.

Alisema kampeni na harakati nyingi za kisiasa na uchaguzi hufanyika mijini ambako kuna mfumo rahisi wa mawasiliano huku maeneo ya vijijini yakisahaulika au kutopewa kipaumbele.

Wanafunzi hao walisema somo la uraia linalofundishwa sasa hivi shuleni lina upungufu wa mkazo wa eneo la muhimu la uzalendo, uadilifu na uwajibikaji katika jamii.

Maafisa kutoka taasisi hiyo, Zulekha Ibrahim na Dianarose Leonce, waliwataka wanafunzi na vijana wote wenye umri na sifa ya kupiga kura kuchanganua hoja, sera na ahadi za wagombea na vyama.

Rais wa Serikali ya wanafunzi shuleni hapo, Innocent Benjamin, alisema elimu ya uraia na uzalendo itawajengea vijana uwezo wa kujitambua mapema.