Walioathiriwa na mafuriko Tabora wapatiwa msaada.

WAHANGA wa mafuriko katika Manispaa ya Tabora wamekabidhiwa msaada wa chakula tani 1.4 za unga wenye thamani ya zaidi ya sh milioni 1.2 baada ya nyumba zao kubomoka kutokana na mvua kubwa zinazonyesha.

Msaada huo ulitolewa na uongozi wa Manispaa ya Tabora kwa wahanga hao zaidi ya 100.

Akikabidhi msaada huo wa chakula kwa uongozi wa Kata ya Malolo katika manispaa hiyo ili kuzigawia familia 102 zinazoishi Mtaa wa Uzunguni, Mkuu wa Wilaya ya Tabora, Suleiman Kumchaya, aliwahakikishia wananchi hao kuwa serikali ipo pamoja nao na itafanya kila linalowezekana kukabiliana na hali hiyo.

Alisema maeneo yaliyoathiriwa na mafuriko hayo yako bondeni ndiyo maana ikinyesha mvua kubwa maji kutoka maeneo mbalimbali hufurika katika maeneo hayo kwa kukosa mahala pa kutokea.

“Ndugu zangu nawapeni pole kwa matatizo haya, lakini napenda kuwahakikishia serikali iko pamoja nanyi na tutafanya kila liwezekanalo kumaliza matatizo haya na kwa kuanzia nimemwagiza meneja wa Tanroads alifanyie kazi,” alisema.

Aidha, aliwataka wadau wengine kujitokeza kuunga mkono jitihada zinazofanywa na uongozi wa manispaa hiyo kuwasaidia wahanga hao.

Mkurugenzi Mtendaji wa Manispaa hiyo, Alfred Luanda, alisema watahakikisha kila mmoja aliyeathirika na mafuriko hayo anapata msaada unaostahili.

Mbunge wa Tabora Mjini, Ismail Aden Rage naye alitembelea wahanga hao na kuwapa pole.

Chanzo: Tanzania Daima