Ama zao au zetu – Lowassa

MGOMBEA urais wa Chadema ambaye pia anawakilisha Umoja wa Katiba ya Wananchi (Ukawa), Edward Lowassa, amesema vyama vinavyounda umoja huo visipochukua dola katika Uchaguzi Mkuu wa Oktoba mwaka huu, havitaweza kuchukua tena kwa miaka 50 ijayo.

Akizungumza Makao Makuu ya Chama Cha Wananchi (CUF) Buhuruni jijini Dar es Salaam jana mbele ya maelfu ya wananchi waliojitokeza kumpokea alipofika katika ofisi hizo kwa mara ya kwanza, Lowassa alisema ni lazima Ukawa wahakikishe wanashinda uchaguzi mwaka huu.

Lowassa alisema ni lazima umoja huo uhakikishe kuwa wanafanikiwa kuingia Ikulu katika uchaguzi huu kwa sababu wakifanya kosa, hawataweza kufanikiwa hadi baada ya miaka 50.

Kauli hiyo ya Lowassa ilikuwa ni ya kuunga mkono kauli iliyotolewa na mgombea mwenza wake, Juma Duni Haji, aliyedai kwamba balaa kwa Chama Cha Mapinduzi (CCM) kama watashinda uchaguzi huo, litakuwa la kihistoria.

"Nimetumwa na uongozi kuja kuungana na Lowassa hadi kuhakikisha tunaingia Ikulu. Naamini tutafika. Tusipofika mwaka huu tutasubiri miaka 50 ijayo maana hilo balaa lake kwa hawa jamaa litakawa halipimiki," alisema Duni, kauli ambayo Lowassa aliiunga mkono.

Lowassa aliwasifu viongozi wa Ukawa akisema ni imara na hodari kwani pamoja na misukosuko waliyopitia, lakini wameshinda na bado wapo pamoja wakisubiri ushindi utakaopatikana mapema asubuhi ya Oktoba 25 mwaka huu.

Alisema viongozi hao wa Ukawa hawahongeki bila kufafanua ni nani aliyejaribu kuwahonga, na kuongeza kwamba wakiendelea namna hiyo Ikulu ni yao mwaka huu.

Alisema Ukawa watakwenda Ikulu kupitia masanduku ya kra na si kwa maandamano akiwataka wananchi na wanaUkawa kutunza shahada za kupigia kura.

Akizungumzia safari yake ya leo kwenda kuchukua fomu katika ofisi za Tume ya Taifa ya Uchaguzi (NEC), Lowassa aliwataka wanachama na wapenzi wake kujitokeza kwa wingi akiwasihi kuwa na busara ili waondokane na sifa ya kuitwa wakorofi.

"Wanasema tuna fujo. Sasa kesho (leo) tujitokeze kwa wingi kwenda kuchukua fomu, lakini tuwe waungwana tusitukane wala kugombana na mtu ili tusiwape kisingizio. Muwe na nidhamu wasipate hoja ili tuwashinde mapema asubuhi," alisema Lowassa ambaye katika mkutano wa kutambulishwa Ukawa, alitahadharishwa na Mwenyekiti wa Chadema, Freeman Mbowe, kuwa: “Ujiandaa, maana huku kuna mabomu (ya machozi). Lakini huenda wewe (polisi) watakuheshimu kidogo.”

Lowassa alipotaka kuwapa pole wanaCUF kutokana na kujiuzulu kwa aliyekuwa Mwenyekiti wao, Profesa Ibrahim Lipumba, wanachama walimtaka kuachana na suala hilo kwani wameshalisahau na hawajadhurika kwa chochote.

Kwa upande wa mgombea mwenza wa Ukawa, Duni, alisema hawakuja kwenye vyama kutafuta vyeo ndiyo maana aliamua kuachia nafasi ya Uwaziri na Makamu Mwenyekiti wa CUF ili kuunganisha nguvu na Lowassa na hatimaye kuingia Ikulu.

Mwenyekiti wa Chadema, Mbowe, alisema zimetumika nguvu nyingi za fedha kuhakikisha Ukawa wanasambaratika lakini kwa kuwa ulikuwa mpango wa Mungu, bado wapo pamoja na imara.

"Tumeweza kufika hapa tulipo na safari yetu imebaki kidogo tufike tunapotaka kwa kuwa malengo yetu yanafanana na tumepata baraka kutoka kwa Mungu ila akitokea kiongozi kati yetu akaona malengo yetu hayafai kuliko fursa binafsi, huyo hatufai, bora aende," alisema Mbowe katika kauli iliyoonekana kama ni kijembe kwa Profesa Lipumba na Dk. Slaa walioondoka Ukawa.

Alisema mgombea wao wiki chache zilizopita alikuwa CCM na mgombea mwenza alikuwa CUF lakini wamewapa nafasi kutokana na kuwa sio walafi wa madaraka na wao ni familia moja.

Joto la uchaguzi Arusha, Mwanza nyuzi 100

Wakati huo huo Mwenyekiti wa Chama Cha Mapinduzi (CCM) Mkoa wa Arusha, Onesmo Ole Nangole, akijiuzulu wadhifa wake huo, kada mwingine wa chama hicho, Dk. Raphael Chegeni, ametangaza kuvunja urafiki wa kisiasa na mgombea urais wa Chadema, Edward Lowassa.

Taarifa za kujiuzulu kwa Ole Nagole zimethibitishwa jana baada ya kuwepo uvumi kwa muda mrefu kuwa alikuwa na mpango wa kufanya hivyo na kumfuata Lowassa Chadema.

Sambamba na Ole Nangole, makada wengine walioachia uongozi ndani ya CCM mkoani Arusha jana ni Mwenyekiti wa Umoja wa Vijana wa CCM (UVCCM) Mkoa, Robinson Meitinyiku na Katibu Mwenezi wa chama hicho Mkoa, Isack Kadogoo.

Raia Tanzania linafahamu kwamba mipango ya viongozi hao kuondoka CCM ilianza mara baada ya vikao vya juu vya chama kulikata jina la Lowassa mjini Dodoma katika harakati zake za kuwania urais kupitia chama hicho.

Wadau mbalimbali wa siasa za Arusha waliliambia gazeti hili jana kuwa viongozi hao wamejiuzulu ili kwenda kuongeza nguvu ya kampeni za urais za Lowassa  ndani ya Chadema.

"Hawa waliokuwa mstari wa mbele kwenye kampeni za Lowassa ndani ya CCM na alipokatwa kugombea urais, walifedheheka sana," alisema mmoja wa watu wa karibuna Ole Nangole.

Vikao vya mkakati wa kuhama CCM vilikuwa vikifanyika kwa siri katika Hoteli ya Milestone jijini Arusha na jana jioni ilidaiwa kuwa walikuwa safarini kwenda Dar es Salaam kumsindikiza Lowassa Tume ya Taifa ya Uchaguzi (NEC) kuchukua fomu za kugombea urais.

Katibu wa CCM Wilaya ya Arusha Mjini, Ferous Bano, alithibitisha kujiuzulu kwa viongozi hao huku akisistiza kuwa ndani ya CCM kuna viongozi mahiri zaidi ya hao waliojiuzulu na kwamba kuondoka kwao hakuna madhara.

“Hawa (waliojiuzulu) ni kama tikiti maji. Yaani ni tunda kubwa ukilitazama lakini ndani ni maji tu, hakuna lolote. CCM kwa sasa haihitaji viongozi matikiti maji na itaendelea kubaki imara siku zote," alisema Bano.

Alisema hajasikitishwa na kuhama kwao kwani wamedhihirisha udhaifu wao katika uongozi.

Bano alisema mlango upo wazi kwa kiongozi yeyote anayetaka kuondoka CCM huku kukiwa na taarifa kwamba yupo kiongozi mwingine atakayeondoka wiki hii.

 

Chegeni amtosa Lowassa

Wakati hali ikiwa hivyo jijini Arusha, mkoani Mwanza, Mjumbe wa Halmashuri Kuu ya CCM Wilaya ya Busega mkoani Simiyu, ambaye ndiye alikuwa kiongozi wa kambi ya Lowassa Kanda ya Ziwa, Dk. Raphael Chegeni, ametangaza kuvunja urafiki wao huo wa kisiasa.

Akizungumza jijini Mwanza jana, Dk. Chegeni, ambaye alimshinda Mbunge wa Busega anayemaliza muda wake, Dk. Titus Kamani kwenye kura za maoni, alisema urafiki huo umevunjika baada ya Lowassa kuhamia Chadema na kwamba sasa ameelekeza nguvu kubwa kushirikiana na wanaCCM wengine kumnadi mgombea urais kwa tiketi ya chama hicho, Dk. John Magufuli.

“Siwezi kuwa na rafiki wa kisiasa nje ya CCM, rafiki yangu mzuri ni ambaye yuko ndani ya CCM kwa hiyo Lowassa si rafiki yangu tena," alisema Dk. Chegeni na kuongeza:

"Tulikuwa na kambi 38 za wawania urais, lakini mchakato ulikamilika baada ya Mkutano Mkuu wa CCM Taifa kumchagua Dk. Magufuli kuwa mgombea wetu wa urais, huyo ndiye tingatinga la Chama Cha Mapinduzi.

"Nilimtetea Lowassa kwa sababu nilikuwa naamini atakuwa Rais, lakini tukamchagua Dk. Magufuli, hivyo tulivunja kambi zote Dodoma na kubaki na moja, ya Dk. Magufuli. Kwa sasa jukumu letu kubwa wanaCCM ni kumuunga mkono akivushe chama chetu na kufufua matumaini ya Watanzania."

Akizungumzia kura za maoni Busega, Dk. Chegeni alisema mshindani wake wa karibu, Waziri wa Maendeleo ya Mifugo na Uvuvi, Dk. Kamani, hana sababu ya kulalamikia matokeo kwani katika uchaguzi suala la kushinda na kushindwa ni la kawaida na kwamba yeye amewasamehe wote waliojaribu kuvuruga uchaguzi huo.

Chanzo: Raia Tanzania