Mabasi ya kasi yaanza safari za majaribio

 

Moja ya basi litakalotumika katika mradi wa mabasi yaendayo haraka (BRT) likitoka katika kituo cha Ubungo wakati wa uzinduzi wa mafunzo kwa madereva watakao toa huduma za usafiri katika mradi huo, Dar es Salaam jana

Waziri wa Nchi Ofisi ya Waziri Mkuu, Tawala za Mikoa na Serikali za Mitaa (Tamisemi), Hawa Ghasia amezindua rasmi mafunzo maalumu ya madereva wa Mabasi Yaendayo Haraka (DART), mradi unaotekelezwa jijini hapa.

Uzinduzi wa mafunzo hayo ni ishara ya kukamilika kwa awamu ya kwanza ya mradi wa DART wenye urefu wa kilomita 20.9 kutoka Kimara hadi Kivukoni. Mabasi ya majaribio na wakufunzi kutoka China wameshawasili kuwajengea uwezo madereva wa ndani.

Ghasia alisema mradi huo ni kwanza kwa ukanda wa Afrika Mashariki na wa pili Afrika baada ya ya Afrika Kusini.

“Kutakuwa na mfumo wa kuratibu mabasi yote yaliyo barabarani ili kuona mienendo na kama kutakuwa na jambo lolote lisilo la kawaida vyombo vya usalama vitachukua hatua mara moja. Matendo ya dereva na abiria pia yataonekana wazi kupitia mfumo huo,” alisema Ghasia

Jukumu la mafunzo ya udereva na matengenezo ya magari hayo mapya na ya kisasa limekabidhiwa kwa Chuo cha Usafirishaji (NIT) pamoja na Chuo cha Mafunzo ya Ufundi Stadi (Veta).

Katika safari moja ya majaribio kutoka Ubungo hadi Kimara; kwenda na kurudi, basi moja refu lilitumia dakika 14 likiwa limewabeba Waziri Ghasia; Mkuu wa Mkoa wa Dar, Said Mecky Sadiki; makamanda wa polisi, Suleiman Kova na Mohammed Mpinga na baadhi ya waandishi wa habari kutoka vyombo mbalimbali.